Македонската музичка сцена е побогата за нов бенд кон денеска го објави својот прв видео-запис за нумерата со наслов „Ива“.
Бендот го сочинува триото Емил Бакев како фронтмен, Љупчо Стевановски на гитара и Огнен Митев кој е продуцент кој живее и работи во Минхен, познат како Fussflow.
„Членовите на бендот 'Вселенаутика' се собраа да прават нова музика на скопската Стара Рампа, каде што всушност вежбаа уште во средношколските денови. Сега, со искуството собрано во далечни земји и на разбранувани мориња, спремни се да ја споделат својата сонична визија со македонската јавност“, вели Бакев во изјава за Кајгана.
Го прашавме и од каде е идејата за интересното име на бендот: „Вселенаутичар е астронаут-wannabe во земја без астрономска опсерваторија, а камо ли вселенска програма. За разлика од вистинските космонаути, вселенаутичарот не живее претерано здраво и не е загрижен поради вишокот килограми - впрочем, борбата со земјината тежа ја искусува само после излегување во град. Од друга страна, во недостаток на инфраструктура и средства, поборниците на вселенаутиката имаат исклучително развиена фантазија и свират гитара подобро од Крис Хедфилд“.
