Новиот холивудски филм на израелската филмска ѕвезда Гал Гадот, наводно, нема да се појави на големото платно во Либан и Кувајт поради поврзаноста со одбранбените сили на Израел.
„Death on the Nile“ беше објавен во остатокот од Блискиот Исток во текот на викендот, пишува Deadline.
Гадот служеше во израелските вооружени сили две години, како што се бара од сите млади Израелци, пред да влезе во светот на шоу-бизнисот.
Ова не е првпат државјанството на поранешната мис на Израел да предизвикува контроверзи бидејќи сè уште постојат тензии меѓу двете завојувани нации. Либан исто така ги блокираше нејзините филмови „Wonder Woman“ поради врските на актерката со војската.
Забраната беше во согласност со законот кој ги бојкотира израелските производи и им забранува на либанските граѓани да патуваат во Израел или да имаат контакт со Израелци.
Кувајт го забрани „Death on the Nile“ по серијата протести на социјалните мрежи, пишува Daily mail, кој се повикува на весникот на арапски јазик Al-Qabas.
Пораката на Гадот за израелското единство на Twitter минатата година, поради ракетните напади на Западниот Брег, предизвика бура од онлајн критичарите кои ја обвинија дека е алатка за „пропаганда“ за израелската војска.
