Градоначалникот на Општина Центар, Горан Герасимовски, објави дека неговата општина ги прифатила уметниците кои повеќе не можат да го користат Младинскиот културен центар.
Културно-социјалниот простор „Центар-Јадро“ и Младинскиот центар „Матично“ ги отворија вратите за уметниците на кои им беше одземен просторот за работа во МКЦ. Ликовните и театарските работилници на уметникот Доротеј Нешовски и актерката Нина Максимова ќе продолжат да функционираат во пријатниот и креативен амбиент на културните катчиња во Општина Центар. Детското ликовно ателје на мултидисциплинарниот уметник Нешовски веќе почна со работа во „Центар-Јадро“.
„На мое големо задоволство и на задоволство на моите млади ученици, на возраст од 5 до 12 години, продолжуваме со редовните активности, двапати неделно во ‘Центар-Јадро’. Ова навистина е прекрасен простор, во кој децата имаат услови да цртаат, сликаат и учат во атмосфера на креативна дружба. Благодарност до Општината и до КСП ‘Центар-Јадро’ што ни го отстапија просторот бесплатно“, вели Нешовски.
Во општинскиот Младински центар „Матично“ е преместено и детското драмско студио, кое функционира во рамките на МКЦ. Театарските работилници ќе се одржуваат еднаш неделно, во саботите, под водство на професионалните актери Нина Максимова, Благојчо Стојанов и Јанка Лефкова.
Градоначалникот Горан Герасимовски вели дека Општината останува отворена за сите креативци, уметници и едукатори, кои придонесуваат за културниот живот во градот.
„Центар е дом на културата, во кој се добредојдени сите креативни сили. И, затоа, во рамките на Општината, ги создадовме овие отворени простори за да ја заживееме културната сцена на Скопје. Продолжуваме да ги промовираме уметноста, творештвото и уметниците“, порача Герасимовски.
