Пари Сен-Жермен го отпушти тренерот Томас Тухел, пренесува германски Sky.
ПСЖ ќе влезе во 2021 година како третопласиран тим на табелата со еден бод помалку од водечкиот Лион и четири порази на 17 натпревари во лигата.
Сепак, тренерот Тухел беше отпуштен ден откако ПСЖ победи со 4:0 против Стразбур.
Bild објави дека Германецот добил отказ лично од спортскиот директор Леонардо, информација што ја пренесоа сите поголеми европски спортски медиуми.
Наводно, Тухел доби отказ поради изјавата:
„Во ПСЖ се чувствувам повеќе како политичар или министер за спорт отколку како тренер.“
Потоа се обиде да се „извлече“ со објаснување дека наводно се шегувал на германски јазик, но бил погрешно протолкуван.
„Не реков дека тоа е повеќе политика отколку спорт, ниту дека не се забавувам на тренинзите. Тоа не е точно. Можно е да бев лошо протолкуван. Јас само реков дека ПСЖ е единствен и дека тоа е голем предизвик за мене. Отсекогаш било така“, се обиде да објасни Тухел.
Германскиот стартег пристигна во ПСЖ во 2018 година и освои две шампионски титули, Купот, Лига купот и минатата сезона го однесе тимот до финалето во Лигата на шампиони. Пред францускиот првак, 47-годишниот тренер ги водеше Борусија Дортмунд, Мајнц и Аугсбург.
ПСЖ водеше на 127 натпревари и оствари 96 победи со 20 порази.
Францускиот шампион се очекува наскоро официјално да ја соопшти оваа вест, но и кој ќе го наследи Тухел. Фаворит за оваа позиција е поранешниот тренер на Тотенхем, Маурисио Покетино, кој е без работа од ноември минатата година. Од 2001 до 2003 година, Покетино го носеше и дресот на ПСЖ како играч.
