На британскиот „Брег на диносаурусите“ неодамна беше пронајден рекорден отпечаток од овој одамна изумрен вид.
Отпечатокот од периодот Јура, долг речиси еден метар, е најголем од ваков вид откриен во Јоркшир. Илјадници отпечатоци од диносауруси и многу фосили се пронајдени покрај брегот на таа област. Последниот случајно го пронашла археологот Мари Вудс додека шетала по брегот во април 2021 година.
„Не можев да поверувам кога го видов, морав двапати да проверам. Претходно наидов на некои помали отпечатоци, но ништо слично на ова“, рече Вудс. По ова случајно откритие, му се обратила на палеонтологот Дин Ломакс од Универзитетот во Манчестер и го прашала за мислење за откритието на кое наишла во заливот Барнистон.
„Мари ме контактираше додека сè уште беше долу на плажата, со фосилот пред неа. Отпрвин, да бидам целосно искрен, помислив дека тоа е шега. Се чинеше невозможно дека Мари се шетала наоколу и случајно наишла на олку голем отпечаток. Плус, таа е археолог. Се шегувавме дека еден ден ќе има неверојатно палеонтолошко откритие“, изјави Ломакс, а пренесува CNN.
Отпечатокот со три прсти е еден од само шесте пронајдени во областа. Првиот беше откриен во 1934 година.
„Ова важно откритие дополнително докажува дека џиновските месојади талкале на овој дел од земјата за време на периодот Јура. Типот на стапалото, во комбинација со неговата старост, сугерира дека го направил диносаурус сличен на мегалосаурус", рече локалниот геолог Џон Хадсон.
Мегалосаурус бил еден од најголемите предатори на своето време, имал голем череп вооружен со остри, назабени заби. Достигнувал должина и до 8-9 метри. Експертите подоцна го однеле отпечатокот во музејот и галериите на Скарборо за да го заштитат од понатамошна ерозија.
Ова им овозможи на Хадсон и Ломакс детално да го проучат ова откритие. Тие го анализирале обликот на стапалото, бројот на прстите и трагите од канџите, како и отпечатоците од кожата на диносаурусот.
„Најинтригантната карактеристика на ова откритие е долгиот дел на задниот дел од стапалото, отпечатокот на она што го нарекуваме метаподиум. Тоа значи дека нашиот голем месојад веројатно клечел или се одморал во калта пред да стане, да замине и остави вечен отпечаток зад себе. Забавно е да се замисли како овој диносаурус шета по калливата крајбрежна рамнина во едно мрзливо неделно попладне во периодот Јура“, рече Ломакс.
По завршувањето на работата на фосилизираниот отпечаток, властите ќе го изложат во музеј.
