Се прашувате која е најдобрата возраст за раѓање дете?
Студија што опфати повеќе од 31.000 породувања покажа дека децата родени од жени на возраст од 23 до 32 години имаат најмал ризик од вродени дефекти.
Тинејџерките и жените во раните дваесетти години имале поголема веројатност да раѓаат деца со дефекти на централниот нервен систем, кои влијаат на развојот на мозокот и 'рбетот, додека бременостите на жените во зрели години најчесто се поврзуваат со деформитети на главата, вратот, очите и ушите.
Научниците од Универзитетот Семелвајс во Унгарија ги анализираа податоците за 31.128 бремености со потврдени нехромозомски вродени дефекти, забележани во официјалната унгарска база на податоци помеѓу 1980 и 2009 година. Тие ги споредија тие податоци со повеќе од 2,8 милиони раѓања во земјата во истиот 30-годишен период.
Севкупно, ризикот од вродени дефекти се зголемил за околу една петтина кај жените под 22 години во споредба со оние во идеалниот опсег на возраст од 23 до 32 години. Исто така, ризикот од вродени дефекти кај жените постари од 32 години бил за 15 отсто поголем.
Наодите се однесуваат на нехромозомски и негенетски вродени дефекти кои не се под влијание на гените на мајката. Негенетските, нехромозомски причини за вродени дефекти вклучуваат консумирање алкохол и тутун за време на бременоста, присуство на одредени медицински состојби и употреба на одредени лекови за време на бременоста.
„Можеме само да претпоставиме зошто постои поголема веројатност дека некои нехромозомските аномалии при раѓање ќе се појават кај одредени возрасни групи. Кај мајките на поодмината возраст, акумулацијата на влијанија како изложеност на хемикалии и загадување на воздухот, влошување на механизмите за поправка на ДНК и стареење на јајце-клетките и ендометриумот може исто така да играат улога“, вели д-р Богларка Пето, доцент на Универзитетот Семелвајс и авторка на студијата.
Извештајот беше објавен во BJOG: International Journal of Obstetrics & Gynaecology.
