Новиот BMW X4 доаѓа по четири години од лансирањето на првата генерација и повторно ќе се обиде да се пресмета со конкуренцијата од Porsche, Mercedes и Range Rover.
Автомобилот ја дели платформата со братскиот Х3, а новата генерација е полесна за 50 килограми од претходната и покрај зголемените димензии.
BMW X4 е дури 81 mm подолг, 37 mm поширок и има 54 mm подолго меѓуосовинско растојание од својот претходник. Порасна и волуменот на багажникот за 25 литри на 525 литри, а патниците сега имаат 27 mm повеќе простор за нозете.
Баварците посветиле и значително внимание на ентериерот што се гледа од фотографиите, а не се штедело и на безбедноста, па располага со сите напредни активни технологии за избегнување на сообраќајни несреќи.
Под хаубата на почеток ќе се најдат четири мотори - два бензинци и два дизели, а во наредните месеци ќе им се придружат уште два шестоцилиндарски во М Performance пакетот.
Дволитарските бензинци развиваат 184 и 252 КС, а дизелите располагаат со 190 и 231 КС. Трилитарскиот бензинец има 360 КС, а трилитарскиот дизел 326 КС. Сите доаѓаат со осумстепен менувач.
BMW X4 ќе биде официјално претставен на автомобилскиот саем во Женева на почетокот од март, а во продажба ќе се најде од средината на годинава.