Украинските трупи се повлекоа од разурнатиот источен град Авдиивка, изјави рано утринава новиот началник на украинската армија, отворајќи го патот за најголемиот напредок на Русија од мај 2023 година, кога го освои градот Бахмут.
Повлекувањето беше најавено бидејќи Украина се соочува со недостиг од муниција поради неусвојувањето на резолуцијата за американската воена помош во Конгресот, а имаше за цел да ги спаси војниците од целосно опкружување од руските сили по неколкумесечни жестоки борби, објави Киев.
Генералот Олександр Сирски, кој го презеде раководството на украинската војска рече дека украинските сили се вратиле на побезбедни позиции надвор од градот, кој пред војната имаше 32.000 жители.
„Одлучив да ги повлечам нашите војници од градот и да почнам одбрана од поповолни линии за да ги спасам животите и здравјето на војниците“, беше цитиран тој во соопштението на вооружените сили.
Загубата на градот речиси две години по руската инвазија може да му даде на претседателот Володимир Зеленски посилен аргумент да побара од Западот поитна воена помош во неговото обраќање на Минхенската безбедносна конференција во саботата наутро.
Американскиот претседател Џо Бајден изјави во четвртокот дека Авдиивка е изложена на ризик да падне во рацете на руските сили поради недостиг на муниција по неколкумесечното противење на конгресните републиканци на новиот американски воен пакет помош за Киев.
Заземањето на Авдиивка е клучно за целта на Русија да обезбеди целосна контрола врз двете провинции кои го сочинуваат индустрискиот регион Донбас, а исто така може да му донесе победа на претседателот Владимир Путин на изборите следниот месец.
„Преземаме мерки за стабилизирање на ситуацијата и одржување на нашите позиции“, рече Сирски.
Руското Министерство за одбрана, Зеленски и украинскиот министер за одбрана не го коментираа веднаш повлекувањето.
Русија ја засили офанзивата на Авдиивка во октомври, а украинските позиции се сè позатегнати со недели.
