Уште на влезот можете да почувствувате чудна енергија што не доаѓа од овој свет, вели Димитриос Макридопулос за грчката пештера за која има најразлични сведоштва и шпекулации за воени експерименти.
Мистериозното место се наоѓа во близина на Атина, а речиси никој не го посетува. Причината за тоа се бројни суеверија кои само обожавателите на паранормалното доаѓаат да ги истражат. Пештерата Давелис се наоѓа на југозападната страна од планината Пендели, од каде порано се носеле материјалите за изградба на Партенон.
Пештерата е именувана по разбојник од XIX век по име Давелис. Тој и неговата банда го користеле ова место како скривница и според легендата, имало лавиринт од тунели што воделе кон куќата на војвотка која му била љубовница. На влезот во пештерата, во карпата, има црква од 12. век.
Малку подлабоко во пештерата, се чествувал богот Пан, а остатоци што го потврдуваат тоа можат да се видат во Археолошкиот музеј во Атина. Релјефи на поранешни патници-намерници може да се видат на еден од ѕидовите, вклучително и неколку англиски писатели од 19. и почетокот на 20. век.
Постојат записи дека грчката војска таму изведувала доверливи операции, поради што пештерата била затворена за јавноста. Меѓу теориите на заговор се и оние поврзани со нуклеарно оружје и експерименти изведувани за време на Студената војна.
Статусот на локација со паранормални активности го доби поради различните сведоштва на луѓе кои биле доволно храбри да влезат внатре. Тие, наводно, виделе како капе вода од подот кон врвот на пештерата, суштества што личат на мачки кои одат исправено, а со електронските уреди се случува нешто чудно - тие се исклучуваат и се расипуваат кога сте во пештерата.
Димитриос Макридопулос отсекогаш бил фасциниран од необични појави. Од детството до зрелоста „голтал“ книги за окултни појави, а станал љубопитен и за планината Пентели која има форма на пирамида.
Без оглед на тоа што е вистина, студија што ја спроведе Јоргос Д. Пападеас од Грчкиот институт за геологија и истражување на минерали во 2002 година, покажа дека има нешто необично во пештерата. Научниците пронајдоа плоча збогатена со графит помеѓу слоевите мермер, што ја прави планината добар спроводник на електромагнетни бранови.
Покрај тоа, мермерот од оваа планина има одредени научни својства што доведуваат до добивање електричен полнеж во услови на висок притисок, што може да ги објасни бизарните електромагнетни појави, но и здравствените, како што се вртоглавица и дезориентираност.
На тој начин, Димитриос Папаниколау, професор по геологија на Универзитетот во Атина, кој ја проучува Пентели од 1973 година, вели дека ништо паранормално не се случува на планините, туку дека науката објаснила сè.