Скопје, 15 јуни 2020 (МИА) – Лидерот на ВМРО-ДПМНЕ Христијан Мицкоски преку својот Facebook профил потврди дека ќе учествуваат на изборите на 15 јули.
– На изборите на 15 јули, среда, ќе учествува ВМРО-ДПМНЕ и заедно со народот ќе го победи изворот на кризата Зоран Заев и СДСМ. Двата услови кои ги баравме се прифатени, прво протоколи за заштита на здравјето на граѓаните, второ мисија на ОБСЕ и ОДИХР за заштита на волјата на граѓаните, напиша Мицковски.
Во статусот на Facebook, Мицкоски оценува дека државата се наоѓа во лоша економска и здравствена криза и оти единствениот излез се изборите и како што вели, убедлив пораз на Заев и СДСМ.
– Македонија овие три години не успеа, доживеа порази на економско, здравствено и политичко поле. Време е да се стави крај на сето ова, време е за промени, а Македонија да излезе посилна, пишува Мицкоски.
„Ние преземаме чекор веднаш да заврши оваа игра на нерви за да не страда народот. Се знае и во минатото кој бил одговорен и кон граѓаните и кон државата. Така и сега СДСМ ја покажува својата големина, разбирање и одговорност. За не страда народот и да му се овозможи на Мицкоски и ВМРО-ДПМНЕ на дело да ја покаже својата одговорност, го заклучуваме 15 јули како конечен последен и единствен датум за избори на кој гарантирано ќе учествува опозицијата, изјави Заев на денешната прес-конференција во седиштето на партијата.
Тој истакна дека два дена претходно ќе гласаат болните и изнемоштените, меѓу кои и лицата со коронавирус, но и оние кои се во домашна изолација и самоизолација. Молкот ќе настапи на крајот на денот на 12 јули во недела.
Претседателот на државата Стево Пендаровски го поздравува постигнатиот договор помеѓу лидерите на политичките партии, предвремените парламентарни избори да се одржат на 15 јули годинава.
Како што соопштија од неговиот Кабинет, истовремено претседателот Пендаровски искажува очекување дека изборите ќе бидат фер и демократски, како што доликува на земја членка на НАТО и земја којашто отпочнува преговори со Европската Унија.
– Постигнатиот консензус за датумот за одржување на предвремените парламентарни избори, според претседателот Пендаровски е уште еден показател дека во секоја зрела демократска земја неопходен е политички дијалог преку кој се носат усогласени одлуки и одлуки исклучиво во интерес на граѓаните на нашата земја, стои во соопштението од Кабинетот на претседателот на државата.
