Златан Ибрахимовиќ има повреда поради која би требало да пропушти три натпревари од Серија А и двата дуела со Манчестер Јунајтед во Лига Европа.
Ибра синоќа против Рома заработи повреда на адукторот на левата нога, повреда за која првичните испитувања велат дека Швешанецот ќе мора да паузира три недели.
Златан почувствува болки уште околу 15-тата минута на „Олимпико“, но остана на теренот и играше сѐ до 56-тата. Можеби тоа играње со сила го направи проблемот поголем и паузата подолга.
Тој дефинитивно отпаѓа за дуелите со Удинезе в среда и со Верона в недела, а речиси сигурно ќе го пропушти и враќањето на „Олд Трафорд“ наредниот четврток.
Дополнителни прегледи на повредата треба да му бидат извршени за 10 дена, еден ден пред првиот дуел со Јунајтед, но од сегашна гледна точка речиси неверојатно е да биде подготвен за играње.
Да биде бељата поголема, на Ибра му се заканува пропуштање и на дуелот со Наполи и дури и реваншот со Манчестер, а доколку сѐ биде в ред можеби би се вратил за натпреварот од 28. коло на гости кај Фиорентина.
Ова е четврта пауза за Ибра сезонава. Прво паузираше откако закачи корона, потоа истегна мускул на бутот, па претрпе суфузија на задната ложа и сега ова.
И покрај тоа, има 14 постигнати голови на исто толку натпревари во Серија А, 1 гол на 5 натпревари во Лига Европа и 1 гол на 2 натпревара од Копа Италија.
