Новото засилување на Милан воопшто не се кае што го напушти Монако и што дојде во клуб каде има поголема конкуренција.
Денеска Милан го претстави најновото засилување, младиот Пјетро Пелегри, кој доаѓа на позајмица од Монако, но со задолжителен откуп доколку се исполнат одредени услови.
„Иако авантурата во Монако не ми помина добро, сега индината ми е светла. Џеноа беше мој дом, Монако ми беше искуство за учење, но Милан е сонот. Искуството во Монако можеби не беше позитивно, но би го повторил, затоа што ме научи многу“, рече Пелегри на денешната прес-конференција.
Сепак, и во Милан се очекува Пелегри да ја грее клупата бидејќи неприкосновени во нападот се Златан Ибрахимовиќ и Оливје Жиру.
„Сон е да се игра со овие шампиони. Дојдов во Милан за да учам и го одбрав дресот со бројот 64 бидејќи тоа е годината кога е роден мојот татко. Сакам да му се оддолжам на клубот и да ја оправдам довербата“, додава тој.
20-годишниот Пелегри потекнува од младинската акдемија на Џеноа, клуб за кој во 2016 година го имаше своето деби во Серија А кога на 15 години и 280 дена стана најмлад дебитант. Летото 2018 се пресели во Монако за 25 милиони евра и уште во првата сезона го сруши рекордот на Килјан Мбапе за најмлад стрелец на клубот.
„Беше неверојатно кога го запознав Златан. Тој ми беше идол додека растев и сега е неверојатно што се поздравувам со него“.
„Жиру е играч кој има многу освоено. Тој е шампион и може да ми помогне. Ќе го пратам на тренинзи и многу ќе научам од него. Сакам да ги покажам моите квалитет и одлучност и да останам тука“, заврши младиот напаѓач.
Лани Пелегри и дебитираше во дресот на сениорската репрезентација на Италија.