Европските клубови, особено оние кои се натпреваруваат на најелитното ниво, не мируваат за време на Светското првенство и посветено ја планираат својата иднина.
Од Англија доаѓа вест која ќе ги израдува навивачите на Манчестер Сити. Тренерот Пеп Гвардиола го продолжи договорот со клубот, според кој ќе остане на чело на актуелниот шампион до 2025 година.
Гвардиола пристигна во Сити пред шест години и за тоа време освои 11 трофеи со клубот, вклучувајќи четири титули во Премиер лигата во последните пет сезони. Неговиот претходен договор истекуваше во летото следната година, поради што се шпекулираше дека ќе го напушти Островот.
Тој дури беше поврзуван со преселба во МЛС или преземање на една од најдобрите светски репрезентации, но изгледа дека еден од најдобрите и највлијателните тренери на сите времиња ќе остане уште некое време во Манчестер. Неговиот мотив е веројатно ловот на трофејот во Лигата на шампионите, кој го освои двапати на чело на Барса, но никогаш во Сити.
