Манчестер Јунајтед продолжува да биде очаен, а синоќешниот висок пораз од градскиот ривал Манчестер Сити го искористи Пеп Гуардиола да предупреди дека она низ кое минуваат „Ѓаволите“ може лесно да им се случи и на „Граѓаните“.
Откако сер Алекс Фергусон ја напушти клупата на Јунјатед во 2013 година, „Ѓаволите“ и ден денес не се ни блиску налик на тимот на славниот шкотски стратег. Ферги освојуваше титули на сите фронта, или барем се бореше за нив, а неговите наследници како Дејвид Мојс, Луи ван Хал, Жозе Мурињо и Оле Гунар Солскјер тоа тешко го правеа. Проблемот е што кога замина Ферги настана и смена на генерациите, проблем во којшто запаѓаат и многу други големи клубови.
Пеп сега не гледа како истото би можело да му се случи на Сити, но предупредува дека во иднина таквата лоша судбина може да чукне и на вратата на „Граѓаните“.
„Клубот е стабилен колку што газдите и сакаат да биде, играме како што сакаат да играме, но мора да сме свесни за примерот на Јунајтед. Пред една деценија тие не ни помислуваа дека ќе им дојдат вакви времиња каде ќе бидат без титула во Премиер лигата“, рече Каталонецот.
„Мора да учиме бидејќи може и нам да ни се случи. Веруваме дека сме толку добри што не може да ни се случи и нам, но може, и тоа многу брзо“, додаде.
„Се сеќавам на Милан кој ја освои Лигата на шампипните со Саки и Капело, а потоа години не играше во Европа. Кога бев тинејџер тимот на Саки беше оној на кој цел свет му се восхитуваше, а потоа пад. Тоа е она што треба да го избегнеме“.
Милан сезонава играше првпат во Лигата на шампионите по 2014 година, а тоа се 7 години пауза. Сличен проблем имаше и Интер кој имаше пауза од 2012 до 2018.
Манчестер Јунајтед немаше таков голем пост како италијанските гиганти, бидејќи и по Ферги успеваше по некоја сезона да се најде во елитата. Но, проблемот на Јунајтед е неконкурентноста во Премиер лигата каде иако двапати завршуваше втор, а еднаш трет, бодовно многу заостануваше зад шампионот.
Пеп синоќа го преслуша тимот на Ралф Рангник со 4:1 со головите на Кевин Де Брујне (5' и 28') и Ријад Махрез (68' и 90'+1), а за Јунајтед погоди Џејдон Санчо (22'). На табелата Сити е лидер со 69 бодови, додека градскиот ривал е 5-ти со 47.
