Стратегот на „Граѓаните“ ја брани одлуката на Судот во Лозана сметајќи дека клубот на зелениот терен се изборил за пласман во елитното натпреварување.
„Навистина сум пресреќен за одлуката бидејќи го поби сето она што многумина го велеа за клубот и дека ни даде шанса да го оствариме она за кое се изборивме на теренот“, вели Жузеп Гуардиола.
Судот за спортска арбитража ја поништи одлуката на УЕФА за суспензија од Лигата на шампионите и од есен Манчестер Сити ќе биде дел од ова натпреварување.
„Инвестиравме многу пари, како и многу други клубови. И тоа го направивме на вистинскиот начин. Не бевме суспендирани бидејќи ги следевме правилата за Финансиски фер плеј, во спротивно ќе нѐ суспендираа“.
„Многу клубови инвестираат. Манчестер Јунајтед и Арсенал на периоди порано кога освојуваа трофеи инвестираа далеку повеќе од другите. Челси исто така кога освојуваше инвестираше многу повеќе отколку останатите“, смета тој.
Тимот на „Граѓаните“ сезонава ќе заврши на второто место во англиската лига и со тоа директно ќе стартува од групната фаза на Лигата на шампионите, впрочем како и сите останати англиски квалификанти.
„Во изминатава декада изградивме екипа кадарна да се носи со елитата во Премиер лигата и во Лигата на шампионите. За тоа потребно е клубот да биде финансиски силен, како и другите клубови. Се разбира, правевме и грешки. Сепак, можеме да трошиме онолку пари колку пто нашиот газда сака, но секогаш според ФФП правилата“.
