Pfizer објави дека резултатите од испитувањето на втората од трите фази за вакцината против ковид покажуваат дека истата е безбедна и обезбедува силен имунолошки одговор кај децата. Вакцината создала доволно антитела за заштита кај деца на возраст од 5 до 11 години.
Ова се првите резултати објавени од американскиот произведувач, но од таму велат дека податоците уште не се рецензирани ниту објавени, пишува CNN.
Од Pfizer додаваат дека резултатите ќе ги предадат и на американската Агенција за храна и лекови за одобрување за итна употреба.
Во испитувањето учествуваа 2.268 испитаници на возраст од 5 до 11 години, а биле користени две дози на вакцина применети во период од 21 ден. Користена е доза од 10 микрограми.
„Дозата од 10 микрограми е внимателно одбрана како безбедна доза, поднослива за деца од 5 до 11 години“, стои во соопштението на компанијата.
Имунолошкиот одговор на испитаниците е мерен со набљудување на неутрализирачките нивоа на антитела во крвта во споредба на тие нивоа со контролната група од 16 до 25 години, која доби две дози од 30 микрограми.
