Легендата Андреа Пирло смета дека главна битка за Скудетото ќе водат Интер и Јуве кој пак оваа сезона има најсилен тим досега и мора конечно да триумфира во Лигата на шампиони.
„Интер е прва алтернатива, најопремен е за борба со Јуве. Отсуството на Кјелини ќе му тежи на Јувентус: тој е капитен и лидер, на терен сите го слушаат. Но, купија млади и добри играчи кои ќе бидат на ниво“, изјави Пирло за La Gazzetta dello Sport осврнувајќи се и на повредата на столбот на одбраната Џорџо Кјелини кој барем шест месеци ќе отсуствува.
Сега пензионираниот Пирло го носеше дресот на „старата дама“ од 2011 до 2015 и во сите четири сезони го освои Скудетото. За Интер играше во младоста, од 1998 до 2001, но на двапати беше праќан на позајмици.
„Овој тим на Сари е најсилен досега, но потребно е време за да се вкоренат неговите идеи. Јуве мора да проба да ја освои Лигата на шампиони, а за тоа имаат и тоа каков потенцијал“.
