Тренерот на „Старата дама“ вината за синоќешната бламажа целосно ја гледа во своите редови.
Јувентус за прв пат сезонава запиша пораз во Серија А и тоа на домашен терен од Фиорентина, тим кој сезонава игра очајно и за кого ова беше само трета победа.
Уште по три минути игра одбраната на Јувентус капитулираше, а набрзо тимот на Андреа Пирло остана со десетмина откако Хуан Куадрадо оправдано беше исклучен.
„Црвениот картон не смее да се употребува како алиби. Резултатот не беше поради играта на играчите на Фиорентина, туку поради нашето незалагање“
„При такви случаи се случуваат и вакви лоши ситуации. Во предбожикните натпревати може да се случат вакви опуштања бидејќи на играчите паметот знае да им одлета во празниците. Бевме дефокусирани и не можевме да се вратиме во игра“, вели Пирло за Sky Sport Italia.
„Исклучувањето за мене е оправдано. Можеше да има и некои одлуки во наша корист, но тоа е нешто за кое не сакам да коментирам - можете сами да погледнете“.
Пирло беше прашан за играта на капитенот Леонардо Бонучи кој синоќа беше најслабата алка во тимот на актуелниот шампион. Дефанзивецот има вина за трите гола на Фиорентина, а згора на тоа воопшто не му одеше бидејќи доби само половина од десетте дуели кои ги имаше, што е лош процент за еден искусен дефанзивец.
„Лоша ноќ како оваа може секому да се случи. До овој момент тој играше одлично. На секого му се случува. Тој е наш капитен и ние сѐ уште имаме голема доверба во него“, очекувано Пирло застана во негова одбрана.
