Вистинска бламажа претрпе Јувентус синоќа и тоа на свој терен губејќи со 0:3 од Фиорентина која прв пат сезонава победува на гостински терен.
Дека нема да биде успешна ноќ за „Старата дама“ порача Душан Влаховиќ уште по само три минути кога по еден контра напад ја смести мрежата зад грбот на Војчех Шченсни.
Потоа во 18. минута се случи нов пех за Јуве откако Хуан Куадрадо заработи исклучување. Со отворен ѓон ја нападна ногата на Гаетано Кастровили, а главниот судија Федерико Ла Пена прво му додели жолт картон, но по интервенција на ВАР оправдано ја смени одлуката во директен црвен.
На вториот гол се чекаше до 76. минута. Кристијано Бираги нафрли од левата страна, а во шестнаесетникот Алекс Сандру си ја затресе сопствената мрежа со една несмасна интервенција.
Само пет минути подоцна поранешниот играч на Јуве, Мартин Касерес, ги постави конечните 3:0 по нова асистенција на Бираги, кој пак летово пристигна од Интер.
Ова е само прв пораз за Јувентус сезонава, но интересно, синоќа „Старата дама“ остана уште без 3 бода откако арбитражниот суд на Италија му ја одзема службената победа против Наполи. Така, сега Јуве има 24 бодови, шест, односно пет бодови помалку од Милан и Интер кои своите натпревари ги играат денеска.
Со ова коло завршува есенскиот дел во Серија А бидејќи следува мини-пауза до 3 јануари.
