„Овој пораз ќе нѐ направи подобри, мораме многу да се подобриме за да го стигнеме нивото на Барселона“, вели стратегот на Јувентус за синоќешниот пораз.
Андреа Пирло не бара изговори за поразот од 0:2 среде Трино кој неговиот тим го претрпе синоќа во 2. коло од Лигата на шампионите од моќната Барселона.
„Тежок натпревар против екипа која знае да игра и е многу пред нас. Ние сме екипа во изградба со играчи на кои ова им беше само втор натпревар во Лигата на шампиони. Поразот ќе ни послужи за да се подобриме“, почна Пирло на пресот по натпреварот.
Пирло синоќа мораше да игра без повредените Алекс Сандру, Џорџо Кјелини и Матајс де Лихт, како и без Кристијано Роналдо кој сѐ уште е позитивен на COVID-19.
„Очекувам во најбрзо време да имам на располагање и други играчи бидејќи тимот ни е моментално ограничен па оние кои ги вадам на терен мораат да играат по 90 минути“.
„Овој пат и Ремзи беше на клупата, но не можеше да игра, се надевам и другите набрзо ќе се вратат и што побрзо ќе ги имам на располагање. Кога останавме со 10 играчи премногу се трошевме на пресинг трчајќи во празно“.
„Мораме подобро да се позиционираме на теренот. На моменти Кулушевски и Дибала беа премногу блиску. Кјеза го чувавме на длабочина, но мораме да бидеме побрзи во префрлувањето на топката кога таа треба да стигне то крилата“, рече тој во однос на тактичката поставеност.
Новинарите во Италија му посочија дека средниот ред синоќа бил многу понеквалитетен во однос на оној од 2015 кога самиот Пирло играше, а тогаш Јуве загуби во финалето токму од Барселона.
„Се работи за циклуси, сега имаме млади играчи како Бентанкур и Артур, потоа и Рабјо, им треба натпревари и искуство. Направивме многу грешки при преминот од одбрана во напад. Потребно е да се подобриме за да стигнеме на такво ниво да играме рамноправно со Барселона“, заврши стратегот на „Старата дама“.
