Бразилскиот музичар Жоао Жилберто, кој се смета за основач на музичкиот жанр боса нова, почина на 88 години.
Веста за смртта на светски познатиот музичар ја потврдија неговите деца на социјалните мрежи.
Ќе остане запаметен по многу хитови, од кои најмногу се истакнува „The Girl from Ipanema“ снимена пред 60 години со американскиот саксафонист Стен Гец, песна што е популарна и денес и ја преработуваат бројни музичари ширум светот.
Меѓутоа, човекот кој на светот му ја подари романтичата и носталгична боса нова, последните години од животот ги помина во финансиски и семејни проблеми.
Иако неговите хитови му донесоа многу слава и пари, тој крајот го дочека во банкротирана состојба, во позајмен дом, додека двете најстари негови деца, музичарите Жоао Марсело и Бебел Жилберто, водеа правна битка со неговата последна поранешна сопруга, новинарката Клаудија Фаисол, која ја обвинуваа дека го искористува нивниот стар и беспомошен татко.
