Денеска почна фудбалскиот турнир за мажи на Олимписките игри во Токио, а репрезентацијата на Шпанија е апсолутен фаворит.
Шпанците ќе го отворат турнирот со денешниот натпревар против Египет во Сапоро. „Фуријата“ однесе исклучително силен тим во Токио во кој се стандардните првотимци од неодамна завршеното ЕУРО - голманот Унаи Симон, дефанзивците Пау Торес и Ерик Гарсија, играчот за врска Педри и напаѓачите Дани Олмо и Микел Ојарсабал.
Освен нив, тука е и ѕвездата на Реал, Марко Асенсио како еден од тројцата играчи постари од 23 години, и Дани Себалос, кој е и капитен на овој тим.
Ќе видиме и некои ветерани на турнирот. Франција ќе ја предводи 35-годишниот капитен Андре-Пјер Жињак, а Бразил 38-годишниот Дани Алвис.
Турнирот се игра во Токио, Јокохама, Кашима, Рифу, Саитами, Чофу и Сапоро. Двете најдобри екипи од четирите групи се пласираат во четвртфиналето, а финалето е закажано за 7 август во Јокохама.
Распоред на првиот натпреварувачки ден:
Група А: Мексико - Франција (10 часот), Јапонија - Јужна Африка (13 часот).
Група Б: Нов Зеланд - Јужна Кореја (10 часот), Хондурас - Романија (13 часот).
Група Ц: Египет - Шпанија (9:30 часот), Аргентина - Австралија (12:30 часот).
Група Д: Брег на Слонова Коска - Саудиска Арабија (10:30 часот), Бразил - Германија (13:30 часот МРТ1)