Пол Сколс повторно беше немилосрден во коментарите кон својот поранешен клуб Манчестер Јунајтед.
Овој пат предмет на расправа беше Алексис Санчез, Чилеанецот кој изминатава зима пристигна на Олд Трафорд како најплатен клупски играч.
Мора да се признае дека Санчез е далеку од очекуваната форма откако му се приклучи на Јунајтед, а всушност, навивачите на овој клуб се уште го немаат видено во вистинско светло.
За потсетување, Јунајтед го доведе Чилеанецот поради желбата во трката за неговиот потпис да се победи градскиот ривал Сити предводен од Гвардиола, а дури потоа и поради неговите фудбалски квалитети.
Тоа се гледа и на теренот во однос на тоа дека Мурињо никако не успева да го вклопи во својот состав. Со ова се согласува и легендарниот Пол Сколс кој смета дека трансферот на Санчез во Јунајтед е голем промашок.
„Знам дека Алексис има некои квалитети и дека е добар играч, но никогаш не го гледав како играч на Манчестер Јунајтед. Малку е себичен, некој кој сака да игра само за себе. Не мислев дека е играчот кој ни е потребен, посебно не за тие пари. Не знам како ќе се ослободиме од него сега кога толку многу заработува, ми се чини дека потпиша само за да не оди во Манчестер Сити“, вели Сколс.
Легендата на клубот вели дека ниту Чилеанецот не е единствениот на кого му треба време за адаптација во овој состав.
„Имам чувство дека сите играчи кои сега ќе дојдат во Јунајтед се мачат. Дури и да дојде Лионел Меси, сметам дека и тој би се мачел во овој Јунајтед“, додава Пол Сколс.
