За ручек подгответе полнети пиперки на мексикански начин - раскошен фил со пченка и кашкавал што се топи.
Полнети пиперки е едноставно, а вкусно јадење кое Македонците го обожаваат и е цврсто втемелено во македонската кујна, а се прави и во други балкански држави, како Грција, Србија, Хрватска и Албанија. Ако сте љубител на полнети пиперки, тогаш дефинитивно треба да ја пробате и мексиканската верзија. Во Мексико филот содржи пченка, а меѓу двата слоја месо се става рендан кашкавал.
Потребни состојки:
- 5 бабури
- 1 кромид
- 3 чешниња лук
- 350 гр мелено говедско месо
- ¼ чаша доматна паста
- 320 мл пилешки булјонн
- ½ чаша ориз
- 1 чаша пченка
- 1 чаша ситно сечкан млад кромид
- 150 гр кашкавал*
- 125 мл вода
- масло
- ½ лажичка каенска пипер
- 1 лажица суво оригано
- 2 лажички ким
- 2 лажички коријандер
- 1,5 лажичка кромид во прав
- ¾ лажичка сол
*Рецептот на видеото вели моцарела, меѓутоа станува збор за рецепт прилагоден на европската кујна. Моцарелата не е мексиканска, па затоа можете да употребите кашкавал по ваш избор. Мексиканците полнетите пиперки ги прават со кесо фреско, познато и ккао кесо бланко, кравји кашкавал кој е бел како моцарелата.
Подготовка:
Тенко исечете го врвот на секоја пиперка (каде што е рачката), а потоа отстранете ги семките. На малку масло во тавче пропржете го ситно исечканиот кромид, а кога ќе омекне додадете го и сечканиот лук. Додадете го месото и промешајте, па оставете да се пропржи. Посолете, посипете со каенска пипер, оригано, ким, коријандер и кромид во прав. Повторно добро измешајте и додадете ја доматната паста. Оставете уште минута, па додадете го оризот што претходно сте го измиле, пченката што сте ја процедиле и булјонот (коцка за супа измешана со врела вода). Промешајте и оставете да се крчка околу 15 минути. На крајот додадете сечкан млад кромид, а може и власец. Наполнете ги пиперките до половина со добиената смеса, а потоа посипете ги со рендан кашкавал, па потоа продолжете да филувате со смесата од месото. Секоја пиперка затворете ја со врвот и наредете ги во огноотпорен сад. Истурете вода и покријте со алуминиумска фолија. Се пече во загреана рерна на 180°C околу 45 минути. Потоа извадете ја фолијата и посипете со преостанатиот кашкавал, па печете уште 5-10 минути.
