Аргентина почна клиничко испитување за лекување од COVID-19 со хиперимун серум развиен со помош на коњски антитела, соопшти лабораторијата овластена за ова испитување.
Reuters објави дека серумот го произведува биотехнолошката компанија Inmunova, а се добива со вбризгување на протеинот SARS-CoV-2 во коњи, а животните создаваат огромна количина неутрализирачки антитела. Нивната крвна плазма потоа се прочистува и се обработува.
По позитивните резултати во лабораториски услови, ќе се спроведе клиничко тестирање на ефикасноста на серумот на 242 доброволци на кои им е дијагностицирана умерена до тешка форма на болеста.
„Ако во првите денови можеме да го намалиме размножувањето на вирусот, не само за да ја намалиме неговата моќ, сметаме дека оваа способност за неутрализација би им овозможила на пациентите да развијат своја имунолошка реакција“, изјави Фернандо Голдбаум, научен директор на биотехнолошката компанија Inmunova која го спроведува истражувањето.
Испитувањата почнаа во понеделникот, а првите резултати се очекуваат меѓу октомври и ноември годинава.
Аргентина досега има 175.000 потврдени случаи на заразени со коронавирусот, од кои околу 3.200 починаа.