Нејмар повторно го повреди скочниот зглоб и внесе немир во редовите на ПСЖ. Тренерот Кристоф Галтје денеска истакна дека за повредата на бразилскиот ас виновен е згуснатиот распоред.
Бразилецот синоќа на носилки беше изнесен од теренот откако се повреди на почетокот од второто полувреме при еден дуел со противничкиот играч Бенжаман Андре.
„Ова не е несреќа. Секогаш постојат причини за повредите, а во овој случај тоа е густиот распоред, односно многуте натпревари“, рече Галтје, пренесуваат француските медиуми.
Од Пари Сен-Жермен информираа дека Нејмар во наредните два дека ќе подлегне на дополнителни прегледи за да се утврди тежината на повредата. На прв поглед виткањето на ногата изгледаше страшно и проценките беа песимистички, но клупските лекари сметаат дека нема простор за паника и дека дури и постои можност да биде фит за реваншот од Лигата на шампиони против Баерн, закажан за 8 март.
Токму истиот зглоб Нејмар го повреди на Мундијалот во Катар на натпреварот против Србија.
