Со оглед на бројот на дојдовни нарачки, Jaguar Land Rover воведе трета работна смена за производство на Defender.
Во моментов нешто повеќе од 53.000 клиенти го чекаат моделот Defender на Land Rover, кој се нуди во три опции за каросерија (кои се кријат зад броевите 90, 110 и 130), па во обид да ја намали листата на чекање, британската автомобилска компанија воведе трета работна смена во својата фабрика во Словачка, каде што се произведува еден од најдобрите теренски автомобили на денешницата.
Jaguar Land Rover го произведува и моделот Discovery во словачката фабрика, чија побарувачка во последниот квартал од 2022 година беше минимална, а долгата листа на чекање за Defender се објаснува со проблемите со испораката на делови кои ги мачат повеќето автомобилски компании за изминатите неколку години.
Сè уште не е потврдено дали Jaguar Land Rover ќе го понуди и претходно најавениот Defender во „пик-ап“ верзија, со што би се комплетирала понудата, но се споменува дека електричниот Defender ќе биде готов пред крајот на деценијата. Што се однесува до електрификацијата, Jaguar има намера од 2025 година да произведува само електрични автомобили.
Defender моментално се нуди во комбинација со неколку турбодизел и турбобензински мотори. На врвот на гамата, покрај опциите за каросерија 90 и 110, е верзијата придвижувана од 5-литарски V8 бензински мотор кој развива 525 КС, а со продолжената верзија 130, клиентите може да сметаат на осум седишта.
