„The Trip“ е новиот трилер на Netflix со елементи на црн хумор за сопружници кои сакаат да се убијат еден со друг.
Приказната ги следи Лиза (Нуми Рапејс) и Ларс (Аксел Хени), брачна двојка кои одат во куќа во зафрлен предел за да се убијат еден со друг. Тој е режисер кој сонува за голема кариера, но режира ТВ-сапуници, а таа е актерка која преживува од снимање реклами за еректилна дисфункција, иако се надева на сериозна кариера во театар.
Нивниот брак е проследен со многу проблеми, Лиза го изневерува Ларс, а не помага тоа што сопружниците се мразат од дното на душата. Покрај тоа, тие се во долгови, но имаат платено животно осигурување. И така, кога ќе одлучат да поминат мирен викенд во зафрлената куќа, тие всушност планираат да се убијат еден со друг.
Овој норвешки трилер/хорор е дело на Томи Виркола, „лошото момче“ на скандинавскиот филм, а завршува со крвави конфронтации кои ќе натераат многумина да го дочекаат крајот на филмот со покриени очи.
Во филмот нема да најдете длабоки и значајни разговори за смислата на животот, но затоа не недостигаат пушки, електрошокови, ножеви... Филмот ја следи не само борбата на сопружниците туку и непоканети гости против кои Лиза и Ларс ќе мора да ги здружат силите.
Филмот ги заслужи нашите симпатии и го препорачуваме како адреналинска забава што треба да се погледне.