Во шестиот пакет мерки санкции против Русија, ЕУ договори забрана за 90% од рускиот увоз на нафта во 27 земји до крајот на 2022 година. Челниците се сложија најголемата руска банка Сбербанк да ја исклучат од SWIFT системот и забранија емитување на уште три руски државни телевизии.
Исто така, ќе има и санкции за луѓето одговорни за воените злосторства во Украина.
По најновите санкции на ЕУ, се огласи и најголемата руска банка, пишува Guardian.
Најголемата руска банка соопшти дека делува нормално и покрај исклучувањето од меѓународниот меѓубанкарски систем и санкцијата не ја менува моменталната ситуација со меѓународни трансакции, пренесе РИА Новости.
Во меѓувреме, рускиот постојан претставник при меѓународни организации во Виена, Михаил Улјанов, се огласи на Twitter по објавата на претседателката на Европската комисија, Урсула фон дер Лајен.
„Како што вчера кажа самата таа, Русија ќе најде други увозници. Важно е да се спомене дека таа сега си противречи на нејзината вчерашна изјава. Многу брза промена на начинот на размислување укажува дека ЕУ не е во добра состојба“, напиша тој.
