И покрај сомневањата дека тоа ќе се случи годинава, Raspberry Pi 5 сепак беше претставен.
Станува збор за најновата верзија на микрокомпјутерот која доаѓа со неколку значајни подобрувања по почетна цена од 60 долари. Не само што има подобри перформанси од својот претходник, туку ова е првиот Raspberry Pi за кој компанијата користи свои полупроводници.
„Мозокот“ на микрокомпјутерот Raspberry Pi 5 е 64-битен 4-јадрен ARM Cortex-A76 процесор кој работи на 2,4 GHz и овозможува до трипати подобри перформанси од Raspberry Pi 4, кој се појави пред четири години. Уредот доаѓа и со графички чип VideoCore VII од 800 MHz за кој Raspberry Pi Foundation вели дека нуди „значително подобрување во графичките перформанси“.
Новиот компјутер е многу брз, а The Verge пишува дека прилично се загреvал при употреба, но доаѓал и со активна компонента за ладење која се става директно на плочата.
Raspberry Pi 5 сега има компонента развиена од Raspberry Pi Foundation, таканаречениот јужен мост, дел од матичната плоча што му помага да „комуницира“ со периферните уреди. Благодарение на оваа компонента, микрокомпјутерот направи значаен чекор напред во перформансите и функционалноста на периферните уреди, овозможувајќи поголеми брзини на пренос на надворешниот UAS погон и другите периферни уреди.
Исто така, доаѓа со два MIPI примопредаватели со четири ленти од 1,5 Gbps кои овозможуваат поврзување до две камери или два екрана. Има и нов интерфејс PCI Express 2.0 кој нуди поддршка за „периферни уреди со висок пропусен опсег“, но сепак бара посебен адаптер како што е M.2 HAT за да го искористи тоа.
Што се однесува до портите, можно е да се поврзат два излеза за HDMI 4Kp60 HDMI со поддршка за HDR, слот за microSD, два USB 3.0 порти, два USB 2-0 порти, Gigabit Ethernet и 5V DC напојување преку USB-C. Микрокомпјутерот поддржува Bluetooth 5.0 и Bluetooth Low Energy (LE), како и врвните перформанси на SD картичката, кои се удвојуваат со режимот SDR104.
Сето ова го прави Raspberry Pi 5 повеќе разноврсен, без разлика дали се користи како ултра достапен десктоп компјутер, медиумски сервер или безбедносен систем.
Ќе се нуди со 4 и 8 GB RAM по цена од 60 и 80 долари. Тоа е повеќе од Pi 4, кој се продаваше за 55 и 75 долари.
Продажбата на микрокомпјутерот Raspberry Pi 5 ќе започне пред крајот на октомври.
