Најголемиот и најстар универзитет во Македонија, „Свети Кирил и Методиј“, доби нов ректор, а тоа е професорката Биљана Ангелова од Економскиот институт.
Таа беше избрана на денешното гласање од вкупно 6 кандидати, а право на глас имаа 1.419 професори, доценти и студенти.
Ангелова ќе го замени досегашниот ректор Никола Јанкуловски, кој истера два мандата на чело на УКИМ. Воедно, таа е втората жена ректор на УКИМ по д-р Радмила Кипријанова, која беше на чело на оваа установа во периодот 1995-1998 година.
Ректоратот на УКИМ постои од самото формирање на Универзитетот во 1949 година, кога за прв ректор беше избран Кирил Миљовски.
Професорката Ангелова е родена во Скопје. Додипломски и последипломски студии завршила на Универзитетот „Св. Кирил и Методиј“ во Скопје, каде и докторирала во 1999 година на Економскиот факултет. Во Економскиот институт работи од 1992 година, а во 2007 година прв пат беше избрана во највисокото научно звање научен советник/редовен професор во областа на деловните финансии. Од јуни 2016 година до сега беше проректор за финансии, инвестиции и развој на УКИМ. Во овој период беше и претседателка на комисиите за финансии и за издавачка дејност на Универзитетот.