Како што се одвиваат работите, се поизвесно станува дека Антонио Конте ќе добие отказ во Челзи, иако тој истакнува дека не чувствува притисок и одбива да поднесе оставка.
Челзи моментално е четврти на табелата во Премиер лигата и има дури 19 поени помалку од лидерот Манчестер Сити, а нема поминато уште ниту една цела година од освојувањето на титулата шампион во Англија.
Ако Италијанецот добие отказ, ќе продолжи необичната традиција во Премиер лигата, бидејќи тој ќе стане третиот тренер кој добил отказ во сезоната откако ја освоил титулата.
Претходно, таква трагична судбина го следеше Клаудио Раниери, кој беше отпуштен само осум месеци после историската титула со Лестер Сити, а сезона порано повторно Челзи му даде отказ на тренер кој претходната сезона му донесе титула шампион – Жозе Мурињо.
Вкупно гледано, последните пет шампиони ги менувале тренерите уште во следната сезона, бидејќи пред Мурињо, Мануел Пелегрини го напушти Сити, пред него Сер Алекс Фергусон се пензионираше после последната титула со Јунајтед, а се почна од Роберто Манчини кој доби отказ после титула со Сити.
Во меѓувреме, почнаа шпекулациите околу тоа кој ќе го наследи Конте на клупата на „Сините“, а нов фаворит е Луис Енрике.
Како што тврдат поединечни медиуми, Шпанецот наводно веќе постигнал договор со Роман Абрамовиќ околу преземање на лондонскиот клуб, после дебаклот на Челзи во Вотфорд во понеделникот (4:1).
Енрике е без ангажман откако ја напушти Барселона на крајот од сезоната, а во меѓувреме одби понуда да седне на клупата на Севиља, која подоцна го ангажираше Монтела.