MF Estelle, произведен од компанијата Zeabuz, е првиот самоуправувачки електричен траект во светот кој започна да превезува патници.
За време на патувањето на траектот моментално има екипаж, кој ќе го напушти на почетокот на следната година. Сообраќајниот метеж е постојан проблем ширум светот, а решенијата вклучуваат масовен транспорт, како и подземни тунели. Во случај на градови со водни тела, на оваа цел може да се додадат траекти, но конвенционалните методи на поморски транспорт создаваат емисии на јаглерод и се во конфликт со глобалните цели за преминување кон почист транспорт.
Компанијата Zeabuz е основана во 2019 година со мисија да го направи транспортот на вода поодржлив и да развие автономни решенија за оптимизирање на операциите на пловилата. Во соработка со Torghatten, истакната норвешка бродска компанија, Zeabuz ја претстави својата прва траектна линија помеѓу Содермалме и Кунгсхолмен. Тоа е всушност кратка линија која ќе прави 120 патувања дневно и ќе помогне да се намали метежот на двете патни правци кои моментално се достапни меѓу овие две дестинации.
MF Estelle има електричен погонски систем кој се напојува од соларни панели и може да прими 24 патници. Има автономен систем за навигација кој се напојува со врвната технологија на Zeabuz, но во првата фаза за време на патувањето на траектот ќе биде присутен и човечки оператор. Првично, траектот ќе има 4 поаѓања на час, но услугата постепено ќе се проширува до 15 часа дневно. Фазниот пристап ќе му помогне на Zeabuz да ја оптимизира потрошувачката на енергија врз основа на моделите на патување.
Компанијата со седиште во Стокхолм сака да понуди виртуелни мостови над водните тела и да помогне во намалувањето на застојот на патиштата, но во исто време да обезбеди опција за урбан транспорт што не ја загадува животната средина.
Во компанијата се уверени дека нивната технологија е скалабилна и може да се користи за широк спектар на типови пловни објекти како што се водени шатлови, работни чамци, брзи траекти и траекти за автомобили, сè за подобрување на опциите за транспорт на вода.
Стокхолм ќе биде тест, но целта е да се обезбедат слични можности за патување во другите градови во светот и да се воспостават врски меѓу градовите. Од неодамна Zeabuz соработува со Yinson Green Tech, компанија од Сингапур, со цел да ја примени технологијата на електрични пристанишни пловила.
Автоматизираните решенија треба да ја подобрат ефикасноста на пловилата и да ги намалат емисиите на јаглерод, особено кога станува збор за транспорт на долги растојанија.
Норвешка го предводи развојот на оваа технологија, а бродоградежната компанија Hurtigruten работи на првиот крузер без емисија на јаглерод, кој ќе биде готов до крајот на деценијава. Ќе има електричен погон, а за време на патувањата ќе користи сончева и ветерна енергија.
