Шенжен, 4 август 2018 (МИА) - За почеток на сезоната во францускиот фудбал, Пари Сен Жермен го освои Суперкупот на Франција, откако со убедливи 4:0 го совлада Монако.
Натпреварот се играше во кинескиот град Шенжен, а ова е прв трофеј за новиот тренер на ПСЖ, Германецот Томас Тухел.
Анхел ди Марија беше играч на натпреварот и постигна два гола за францускиот шампион, а по еден гол реализираа Кристофер Нкунку и Тимоти Веа. Посебно импресионираа младите играчи на актуелниот француски шампион, кои добија голема минутажа во овој натпревар.
На натпреварот бранеше новиот голман на ПСЖ, Џанлуиџи Буфон, а Нејмар се појави на теренот во последните двасетина минути од натпреварот.
