Речиси една третина од сообраќајните несреќи се случуваат на раскрсници, а од нив голем број се фатални.
Според новото истражување на германскиот автомобилски клуб ADAC, четвртина од несреќите на германските патишта се случуваат надвор од градовите, а третина од нив се случуваат додека возилата поминуваат низ раскрсница.
Според официјалните податоци, само во 2019 година, на германските патишта, на раскрсници и свиоци загинале дури 340 луѓе, а повеќе од 7.000 биле тешко повредени. За работите да бидат уште полоши, 60% од загинатите во сообраќајни несреќи умираат токму на такви патишта надвор од градовите.
Затоа ADAC одлучи да ја истражи ситуацијата во Германија и околните земји и да предложи решенија за зголемување на безбедноста во сообраќајот.
Во вакви несреќи, без разлика дали се работи за вртење налево на раскрсница, вклучување во сообраќај или едноставно минување низ раскрсница, најчесто гинат помладите, неискусни возачи на возраст под 24 години, но и најстарите, над 65 години.
Тука секако треба да се нагласи големата опасност за учесниците во сообраќајот, кога учествуваат велосипедисти и мотоциклисти.
Слична е ситуацијата во Австрија и Швајцарија.
ADAC како едно од решенијата го гледа воведувањето систем за асистенција каде самиот автомобил би предупредил на опасна ситуација, на која автомобилската индустрија веќе работи напорно и има одредени позитивни резултати на овој план.
До воведувањето на овие системи во сите возила на патиштата, ADAC предлага одредени промени на ризичните раскрсници.
Покрај постигнување подобра видливост на раскрсниците, се предлага поставување физички бариери, одделни ленти за вртење, воведување подобра сообраќајна сигнализација и изградба на кружни текови.