Октомври е месец на борба против ракот на дојка, кога низ цел свет се организираат бројни здравствени настани кои имаат за цел да ја истакнат важноста од раното откривање и одењето на редовни дијагностички прегледи.
Токму затоа лекарите го нагласуваат раното откривање како најважен елемент во борбата против ова малигно заболување, кога ќе се појават првите симптоми.
Во земјава во 2020 година биле регистрирани 988 новозаболени жени од рак на дојка и 316 смртни случаи.
Иако многу жени мислат дека првиот знак на рак на дојка е појавата на грутка, симптомите можат да бидат различни - од гореспоменатата грутка до помалку очигледни симптоми како што се промени на кожата или брадавиците.
Доколку откриете некои од следните симптоми, тоа не значи автоматски дека имате рак, но од голема важност е што поскоро да посетите лекар.
1. Промени во текстурата на кожата
Секоја промена во текстурата на кожата на или околу градите може да биде знак дека нешто се случува што треба да го провери лекар. Имено, кај некои жени кожата е вовлечена, додека кај други се јавуваат брчки. Секоја од споменатите промени може да укаже на фактот дека лимфните канали во внатрешноста на дојката се блокирани, а кога тоа ќе се случи, дојката станува воспалена и отечена и кожата добива поинаков облик.
2. Појава на црвенило или осип
Иако ова е многу редок симптом на рак на дојка, сепак се јавува во некои случаи. Овој симптом најчесто се поврзува со појавата на специфичен тип на рак на дојка, познат и како Паџетова болест на дојката.
3. Појава на грутка или згуснување на кожата
Грутките обично не се видливи со голо око, но тие можат да се почувствуваат и обично се прв симптом на рак. Важно е да се нагласи дека секоја грутка во дојката не е веднаш рак, но дефинитивно е знак за дополнителни испитувања. При самопреглед на градите, важно е да се внимава на пределот околу пазувите.
4. Промени во брадавиците
Секоја промена на брадавицата може или не може да биде симптом на рак. Ако брадавицата е повлечена, тоа може да укаже на постоење на грутка зад брадавицата која го стега ткивото и предизвикува повлекување, а често може да се појави и исцедок.
5. Видливи вени на дојката
Иако видливите вени на дојката обично се знак за бременост, во некои случаи тие можат да укажуваат и на можноста за рак. Имено, видливоста на вените е можна доколку има грутка во дојката која ги притиска крвните садови и предизвикува стагнација или зголемено снабдување со крв во дојката.
6. Оток под пазувите
Отокот или болката под пазувите може да има многу причини, но една од нив е можноста за рак на дојка. Ова може да биде знак дека туморот се проширил на лимфните јазли, поради што е многу важно при самопреглед да се вклучи и пределот околу пазувите, за да може навреме да се забележат сите промени на кожата.
