Баер Леверкузен, според сѐ, прв пат во историјата ќе ја освои титулата германски првак, но во исто време ќе се најде во голем проблем - како да ги задржи најдобрите играчи.
Дваесетгодишниот Флориан Вирц е најголемата ѕвезда на тимот и е интересен за многу европски гиганти, вклучувајќи ги Ливерпул, Манчестер Сити и Баерн, но шпанскиот Fichajes пишува дека Реал направил конкретен чекор и ќе направи сѐ за да го доведе во своите редови.
Претседателот на Реал, Флорентино Перес веќе стапил во контакт со Баер и им рекол дека ќе платат цело богатство за Вирц.
Сепак, нема да го донесат летово, туку следното, а причината секако е финансискиот фер-плеј, бидејќи Килјан Мбапе ќе пристигне во Мадрид на 1 јули.
Ваквиот расплет на ситуацијата му одговара на Баер кој сака да атакува на Лигата на шампионите со Вирц и да ја одбрани титулата следната сезона и многу е реално двата клуба наскоро да се договорат.
„Реал подготвува XXL понуда за Флориан Вирц во 2025 година“, пренесува Fichajes.
„Цената може да биде вртоглави 100 милиони евра“, се додава во текстот.
Оваа сезона Вирц постигна 11 голови и асистираше 17 пати во 37 натпревари во сите натпреварувања.
