Шпанскиот фудбалски шампион Реал Мадрид планира да собере дополнителни 225 милиони евра во заеми за да го заврши реновирањето на стадионот „Сантјаго Бернабеу“, а конечната одлука ќе биде донесена на собранието на клубот в сабота.
Според оригиналниот договор со банките во 2019 година, Реал подигна заем од 575 милиони евра за да го претвори Бернабеу од чисто фудбалски стадион во објект со целогодишна намена.
Целта беше приходите од сегашните 150 милиони евра годишно да се зголемат на дури 400 милиони евра. Претседателот на Реал, Флорентино Перес, најави дека каматните стапки на новата позајмица ќе бидат околу 2 отсто. Во последната деценија Реал четирикратно ги зголеми приходите, во 2019 година тие изнесуваа дури 800 милиони евра, а во 2020 година клубот заврши во плус и покрај пандемијата на коронавирус.
Тревникот е посебна приказна
Во видеото кое трае речиси пет минути, Реал неодамна покажа како ќе изгледа тревникот на новиот стадион. Се прикажува како ќе се чисти, чува и одржува тревникот за натпревари и како со негово отстранување се открива терен со вештачка трева. Гледаме и како просторот може да се прилагоди за саеми, кошаркарски, тениски и фудбалски натпревари и концерти.
Видеото покажува и како тревникот се враќа на површина и се спојува со другите делови, а открива и како ќе изгледа само поткровјето на стадионот, ексклузивен дел од кој во салонски амбиент може да се следат натпревари и други настани. Реконструкцијата треба да заврши во декември следната година, што би се совпаднало со 75-тиот роденден на легендарниот стадион.