Пејачката Ријана доби почесна титула од нејзината родна земја, која ѝ ја додели владата на Барбадос. Нејзините обврски во склоп на функцијата ќе опфаќаат промовирање на образованието, туризмот и инвестициите во оваа островска држава.
Музичката ѕвезда Ријана е прогласена за амбасадорка на Барбадос, земјата во која е родена и каде што израсна. Пејачката рече дека не може да биде повеќе горда откако владата на Барбадос ѝ ја додели оваа титула.
„Ријана чувствува голема љубов за Барбадос што може да се забележи според нејзините филантропски активности, посебно во областа на здравството и образованието. Исто така таа покажа голем патриотизам во начините на кои ѝ помага на нејзината земја“, рече премиерката на Барбадос, Мија Мотли.
Пејачката е родена во местото Сент Мајкл, а до тинејџерските години живееше во престолнината на Барбадос, Бриџтаун. Со добивањето на титулата амбасадор, Ријана ќе има обврска да ја промовира земјата низ светот, посебно кога се работи за образованието, туризмот и странските инвестиции.
„Секој човек од овој остров има своја улога во акцијата, а јас сум подготвена и возбудена да ја преземам одговорноста која ми е доделена. Се радувам на тоа што ќе имам можност да работам со премиерката Мотли и нејзиниот тим за да го поправиме имиџот на Барбадос“, рече Ријана.
