Руски авион-ловец истрелал ракета во близина на британски авион што патролирал во меѓународниот воздушен простор над Црното Море на 29 септември, изјави денеска британскиот министер за одбрана Бен Волас.
Волас пред Парламентот соопшти дека Обединетото Кралство по инцидентот ги суспендирало патролите и изразило загриженост до рускиот министер за одбрана, Сергеј Шојгу.
Москва соопшти дека се работи за техничка грешка, а Волас објави дека Обединетото Кралство сега ги обновило патролите во регионот.
Британскиот министер за одбрана изјави дека инцидентот не го смета за намерна ескалација, а анализите потврдиле дека се работи за технички дефект.
„Меѓутоа, тоа е потсетник колку работите можат да бидат опасни кога ќе одлучите да ги користите вашите ловци на начин како што тоа го прави Русија веќе подолг период“, изјави Волас пред Парламентот.