Егзодусот на европските и јапонските производители на автомобили од Русија заврши, а домашната индустрија е принудена да се снаоѓа на различни начини.
Renault ја предаде својата фабрика во близина на Москва на Русите, со опција да ја врати во нејзина сопственост по шест години.
Впрочем, во Русија беше најавено враќање на некои стари брендови, а сега конечно се знае кога од производствената лента ќе излезат првите автомобили на обновената марка Москвич.
Русите планираат да започнат со производство на познатиот автомобил од советската ера во декември, изјави градоначалникот на Москва Сергеј Собјанин.
Собјанин во мај рече дека производството на Москвич ќе зачува илјадници работни места. Сепак, поранешната фабрика на Renault Avtoframos, сега преименувана во Московска фабрика за автомобили Москвич, оттогаш е неактивна.
„Се надевам дека ќе можеме да ја стартуваме фабриката ‘Москвич’ во декември, со помош на Министерството за индустрија и трговија“, рече Собјанин, цитиран од новинската агенција Интерфакс.
Москвич, што во превод значи „московјанин“, престана да се произведува пред околу две децении. Фабриката „Москвич“ неделава соопшти дека се надева дека ќе произведе околу 600 автомобили оваа година, вклучувајќи 200 електрични возила и 50.000 автомобили во 2023 година.
Тоа ќе бидат претежно модели на кинескиот производител JAC, кои ќе се произведуваат по лиценца во Русија, со брендот и името Москвич.