Египетскиот виртуоз Мохамед Салах има желба да освои трофеј со својата репрезентација и истакна дека титулата на Африканскиот куп на нации би му била најдрага што ја освоил во кариерата.
Салах со Ливерпул беше шампион во Премиер лигата, а ја освои и Лигата на шампионите. Сега со Египет сака да ја освои титулата на африканското континентално првенство.
„Сакам да освојам нешто со репрезентацијата. Тој трофеј би бил сосема поинаков од сите што ги имам освоено досега, би ми бил омилен“, изјави популарниот Мо.
„Бевме блиску до титулата на Африканскиот куп на нации во 2017 година кога загубивме од Камерун во финалето. Но, можам да ве уверам дека ова е трофејот што најмногу сакам да го освојам. Работам напорно за да го остварам тоа“.
Египет денеска од 17 часот во осминафиналето ќе игра против Брегот на Слоновата Коска.
„Нема да ни биде лесно. Но, ние сме во налет. Ќе биде многу тесна битка“, заклучи Салах.
Египет е најтрофејна репрезентација во Африка со 10 титули од континенталното натпреварување, но сите пред ерата на Салах. Последната Египет ја освои во 2010, а Салах една година подоцна дебитираше во репрезентацијата.
