Во изминатите 24 часа, во Саудиска Арабија се погубени 81 затвореник, меѓу кои седум државјани на Јемен и на Сирија, обвинети за тероризам.
Во 2021 година во кралството беа погубени 67 лица, додека во 2020 биле погубени 27, пренесе Reuters.
„Овие лица се осудени за различни злосторства меѓу кои и убиства на невини мажи, жени и деца“, пренесе државната новинска агенција SPA повикувајќи се на соопштение од министерството за внатрешни работи.
„Злосторствата кои ги сториле овие лица исто така вклучуваат завет на лојалност даден на странски терористички организации како што се Исламска Држава и Ал Каеда“, се додава во соопштението.
Меѓу погубените има 37 саудиски државјани кои во еден случај биле прогласени за виновни за обид за убиство на службеник за безбедност и пукање кон полицајци и конвој.
Човечките права во Саудиска Арабија се под поголем надзор на здруженијата за човекови права и западните сојузници од убиството на саудискиот новинар Џамал Кашоги во 2018 година. Саудиска Арабија е остро критикувана поради рестриктивните закони за политичкото и верско изразување како и за спроведувањето смртна казна, вклучително и апсење на обвинети лица додека се уште малолетни.
Ријад негира кршење на човечките права и тврди дека ја штити националната безбедност во склад со законите на земјата.
