Англискиот селектор упати низа пофални зборови за Македонија, која вечерва во Манчестер ќе игра против неговата репрезентација.
„Ја видовме Македонија со Украина како одигра еден час, навистина требаше и да ја победат Украина. Имаат неколку играчи кои се одлични индивидуалци со извонредни индивидуални квалитети, кои играат во големи европски клубови, ама пред сѐ Македонија е тим кој функционира добро. Македонија е селекција која има педигре од минатите квалификации, играа со Португалија во завршниот бараж за пласман на Мундијалот. Не нѐ чека натпревар како во петокот (играа со Малта, заб. на прев.), туку натпревар кој е ниво погоре со многу поголем интензитет и квалитет, и наше е да одиме на победа“, рече Гарет Саутгејт.
Оваа генерација мкедонски фудбалери прв пат ќе имаат можност да играат на легендарниот стадион „Олд Трафорд“, но и Англичаните ретко играат таму. Затоа имаат и посебен мотив.
„Нѐ чека тежок дуел и сакаме тука да одиграме добро, сакаме да ги израдуваме навивачите. Не доаѓаме многу често на северот, затоа ќе се потрудиме да им пружиме емоции и радост, знаеме каква е тука атмосферата. Целта е да играме добро, навивачите да бидат задоволни. Тие се извонредни, прават вистинска атмосфера и тоа е дополнителна возбуда и за фудбалерите. Секако, Македонија ќе сака добро да одигра затоа ќе мора да сме внимателни“, додаде англискиот селектор.
По досегашните три кола Англија има максимален скор откако славеше над Италија, Украина и Малта. Интересно, но на досегашните два натпревара на англиско тло, во Саутемптон и токму тука во Манчестер, Македонија двапати играше нерешено (2:2 и 0:0) во 2002 и 2006 година.
Натпреварот Англија - Македонија почнува во 20:45 часот со директен на МРТ1.
