Езѓан Алиоски се врати на Островот, но со репрезентацијата ан Македонија, која вечерва на „Олд Трафорд“ ќе игра против Англија.
Популарниот Џани четири сезони ги бранеше боите на Лидс Јунајтед, од 2017 до 2021, пред да се пресели во саудискиот Ал Ахли. Сезонава ја мина во редовите на Фенербахче како позајмен.
За време на својата последна сезона во Лидс, Алиоски играше и на „Олд Трафорд“, стадионот на кој вечерва игра Македонија. Тогаш на 20 декември 2020 година ги одигра сите 90 минути пред празниот „Театар на соништата“, поради рестрикциите од пандемијата. Не помина добро, бидејќи неговиот Лидс загуби со високи 6:2.
Вечерва стадионот ќе биде полн.
„Ова е специјален момент за сите, посебно за играчите што прв пат се во Англија и натпревари на овој терен гледале на ТВ во Лигата на шампионите и од Премиер лигата. Сите ќе уживаат, а ако сме подготвени ментално и имаме дисциплина, можеме да направиме нешто тука. Сите знаеме дека нема да биде лесно, дека Англија е голем фаворит, ама ние никогаш не губиме надеж и не се предаваме. Затоа дојдовме тука, да играме“, изјави Алиоски по синоќешниот тренинг.
Токму така, Алиоски има играно на ова грандиозно здание, но останатите никогаш. Дури и тој нема играно пред публика, па вечер и за него ќе биде како прв пат.
Натпреварот Англија - Македонија почнува во 20:45 часот, а директен пренос ќе оди на МРТ1. Правдата ќе ја дели Иштван Ковач од Романија.