На почетокот на овој месец компанијата SpaceX на Елон Маск ја лансираше во вселената најмоќната ракета досега, Falcon Heavy, а во неа се наоѓаше и една црвена Tesla Roadster која се упати кон Марс. Сега можете да го следите нејзиниот лет кон крајната дестинација со само неколку кликови.
Во оваа Tesla Roadster се наоѓа една кукла со човечки пропорции наречена STARMAN, една копија од книгата „Foundation“ на Исак Асимов и мал авион на кој се изгравирани имињата на 6.000 работници на компанијата SpaceX.
Еден ентузијаст кој беше многу возбуден за летот на Falcon Heavy и значењето на лансирањето на оваа ракета, направи вебсајт на кој може да се следи движењето на црвената Tesla, кој детално го прикажува точното место на автомобилот, брзината со која тој лета, и оддалеченоста од крајната локација – Марс.
Вебсајтот, наречен едноставно Where Is Roadster?, вели дека автомобилот не се движи директно кон Марс, туку како и сите објекти во вселената, ѝ подлегнува на гравитацијата, која прави тој да се движи во лак кон крајната дестинација.
Во моментов Roadster-от и STARMAN се наоѓаат на околу 3,7 милиони километри оддалечени од Земјата и 218 милиони километри оддалечени од Марс, а тие нема да стигнат до дестинацијата до 2020 година.