Претседателот на Фудбалската федерација на Македонија, Муамед Сејдини ги пофали македонските репрезентативци за залагањето и покажаната желба за позитивен резултат на натпреварите на ЕУРО 2020.
И покрај денешниот пораз од Украина (1:2) Сејдини е задоволен од изданието на „црвено-жолтите“ посебно во второто полувреме.
„Од самиот почеток на Европското првенство кажав дека мотивот и желбата за победа кај играчите постои. Првото полувреме не бевме на посакуваното ниво, но се покажа карактерот кај нашите фудбалери кои демонстрираат желба за победа и тоа дека сакаат да ги израдуваат нашите верни навивачи кои денеска беа многубројни на трибините во Букурешт. Им честитам на стручниот штаб и на фудбалерите за прикажаната игра.Против Холандија шансите се 50-50. Ние на секој натпревар одиме на победа“, изјави Сејдини.
Македонските фудбалери во последното, трето коло од групната фаза во понеделник во Амстердам ќе играат со Холандија во обид да ги освојат првите бодови на ЕП.
