Претседателот на Шпанската фудбалска федерација, Луис Рубиалес (46) во ексклузивно интервју за Пирс Морган објави дека заминува, по скандалот што го предизвика кога ја бакна репрезентативката Џени Ермосо по освојувањето на Светското првенство.
Сексистичкиот скандал кој се случи за време на доделувањето на медалите и кој долго време ја тресе шпанската женска фудбалска репрезентација по освојувањето на титулата конечно доби епилог.
„Не можам да продолжам со мојата работа“, рече Рубиалес откако 13 години помлада фудбалерка го тужеше затоа што ја бакна против нејзина волја.
Рубиалес во исто време објави дека поднел оставка и од функцијата потпретседател на Извршниот комитет на Европската фудбалска федерација (УЕФА).
Да потсетиме, за време на доделувањето на медалите, Рубиалес против нејзина волја ја бакна во уста репрезентативката Ермосо, а таа подоцна за време на пренос во живо на Instagram изјави дека не ѝ се допаднал неговиот потег.
За време на прославата во соблекувалната, претседателот ја прегрнал Ермосо и ѝ рекол дека ќе се венчаат на Ибица, па сето тоа го засени Светското првенство.
Рубиалес се најде на удар на целиот свет и голем број негови познати сонародници побараа од него да поднесе оставка, а тој синоќа конечно реши да се откаже и да го стави мандатот на располагање.
