Десеткуваната Валенсија вечерва му гостува на најефикасниот тим во Европа, па тренерот Алберт Селадес однапред си најде изговор за евентуалниот пораз.
Валенсија се мачи со бројните отсуства поради повреди, а сега ја чека тешко гостување. Оди во Милано на мегдан со немилосрдната Аталанта чија тактика ја краси безглавото напаѓање. Филозофијата на бергамашите е да се полни мрежата на противникот, дури и по цена да се примат голови.
„Ќе се соочиме со еден и тоа како напаѓачки тим, водечки по постигнати голови во Серија А и Европа, кој игра одлично сезонава. Тие обожуваат да итаат напред. И покрај сите отсуства кај нас ќе се обидеме да им парираме со оние играчи кои ги имаме на располагање“, вели Селадес кој во играчката кариера настапуваше за Барселона, Селта, Реал Мадрид, Сарагоса.
Селадес вечерва поради повреди нема да може да смета на голманот Јаспер Силесен, дефанзивците Габриел Паулиста (плус е суспендиран), Есекиел Гарај, Кристијано Пичини, Алесандри Флоренци, играчот од средината Франсис Кокелан, крилото Ману Ваљехо и голгетерот Родриго.
„За жал, ние се навикнавме да имаме многу повредени играчи. Она што е жалосно е што тие играчи не можат да бидат тука и да уживаат во овој натпревар. Од друга страна, ова е одлична шанса за тие што се овде со нас. Едноставно мораме да се адаптираме на околностите“.
Покрај многуте повредени, Валенсија ја мачи и лошата форма, а особено слабите резултати на гостински терен.
„Нашата гостинска форма не е добра, но и покрај тоа забележавме некои добри резултати на гости сезонава - победивме во Лондон и во Амстердам (1:0 и кај Челси и кај Ајакс). Игравме добро во Лигата на шампионите. Сега сме посветени на вечерашниот натпревар“, заврши стратегот на Валенсија.