Словенија има највисока просечна плата во регионот, 1.181,35 евра, според анализата на Анадолија.
Иако панемијата на коронавирус влијаеше на падот на обемот на деловните активности во голем број сектори во регионот, нивото на просечните плати во 2020 година во сите земји се зголеми, се вели во анализата на Анадолија.
Просечната плата најмногу се зголеми во Словенија, за 59,35 евра (показатели октомври 2020 година - октомври 2019 година), а по неа следи Србија со зголемување од 44,19, Северна Македонија со зголемување од 36,31, Хрватска со 18,41, Босна и Херцеговина за 14,26, и најмалку, 8 евра во Црна Гора.
Дури и пред зголемувањето, просечната плата беше највисока во Словенија, па во Хрватска и во Црна Гора.
Србија ја надмина Босна и Херцеговина со својата просечна плата годинава, а Северна Македонија, иако забележа едно од најзначајните зголемувања кога станува збор за просечната плата оваа година, сепак има најниска просечна плата во регионот, стои во анализата на Анадолија.
Така, сега просечната плата во Словенија е 1.181,35 евра (податоци за октомври 2020 година), Хрватска 890,41 евра, Црна Гора 525 евра (податоци за ноември 2020 година), Србија 512,19 евра, Босна и Херцеговина 490,76 евра и Северна Македонија 454,31 евра.
